Republic of Lebanon

الرئيس دياب: بكرا بيبدأ الإقفال بالبلد حتى نتفادى الإنهيار الصحي وانتبهوا على حالكم

الخط + -
13 تشرين الثاني 2020

مسا الخير

بكرا بيبدأ الإقفال بالبلد حتى نتفادى الإنهيار الصحي بمُجتمعنا ونحمي أنفسنا وأهلنا.

الإقفال بحد ذاتو مش حلّ.. الإقفال هو فرصة حتى نرفع من جهوزية البلد الصحية بعد ما ارتفع عدد الإصابات بشكل كبير خلال الأسابيع الماضية.

مين ما بلّش يشعر أنو هيدا الوباء صار أريب منو؟ الأغلبية انتصروا عليه، بس مروا بمعاناة صعبة.

ماحدا بيأدر يتخيّل النتيجة وردة الفعل إذا كان المصاب الأب أو الأم أو أي فرد من العيلة.

الإحساس أنو عم نخسر شخص قريب منّا وما قادرين حتى نودّعه، بيترك فينا جرح عميق، وحزن كبير.

كتار من الناس انتقدوا قرار الإقفال. وأكيد بتفهّم رأيهم ومعاناتهم الإقتصادية. عم بسمع ردود الفعل من عدة مصادر. ووضع لبنان متل كل دول العالم، المُفاضلة عم تكون بين الاقتصاد وبين صحتنا وحياتنا.

أنا شخصياً بختار الحياة والصحة أولوية على الاقتصاد، وأكيد أنتو كمان هيدا خياركم، لأن شو إلو معنى الاقتصاد من دون حياتنا؟

نحن عم نعمل كل جَهدنا حتى نحصل على اللُقاحات يلي بتحمينا من هالوباء بأسرع وقت ممكن.

صحيح أنو هالوباء بعدو أقوى من قدرة الدول على مواجهتو، لكن الحماية منو مش صعبة أبداً.

مش مطلوب أكتر من الحماية الذاتية:

نحط كمامة ونغسل إيدينا دايماً، ونعقّم الإشيا يلي منستخدمها.

فينا نعمل هيك؟

فينا نوفّر على حالنا وعلى أهلنا ها المعاناة؟

أكيد فينا..

اللبنانيين شعب عنيد وقادر يواجه ويتحدّى.

هيدا الوباء مش أقوى من يلي مرّ علينا.

كل الإجراءات يلي بتاخدها الدولة ما رح تنفع إذا اللبنانيين ما التزموا بوضع الكمامة والتعقيم والتباعد الإجتماعي.  

صعبة؟

أكيد لأ...

أنا واثق أنو إذا التزمنا رح نرجع نكون من أوائل الدول يلي بتنتصر على وباء كورونا، متل ما كنّا بالموجة الأولى.

عم ناشد كل لبنانية.. وكل لبناني.. وكل مُقيم... انتبهوا على حالكم حتى تحموا أهلكم... وحتى نرجع لحياتنا الطبيعية.

الله يحميكم

 

لمشاهدة فيديو كلمة الرئيس، االرجاء الضغط على الرابط التالي:

https://youtu.be/9AirCW4DsfI 

جميع الحقوق محفوظة ©      ملاحظة قانونية  |   إتصل بنا  |  خريطة الموقع
تم انجاز هذا الموقع بالتعاون مع مكتب وزير الدولة لشؤون التنمية الادارية